كورد، لەسەربەخۆییەوە بۆ دەستەمۆبوون

🔻 هەم نەوتەكەمان چوو، هەم سەربەخۆییەكە. 
🔻 بەشێك لەدەستەبژێری سیاسی بۆخاتری بەرژەوەندی حزبیی و گیرفانی شەخسی خۆیان سامانی ژێر زەویان تاڵانكرد
🔻 بەهۆی خراپ سیاسەتی چەوتەوە، كورد بەهێزترین فاكتەری سیاسەتكردنی لەدەستدا
🔻 دەبێ‌ نەوتەكەیان رادەست بكەن، ئینجا مشتومڕی بەشە بودجەشیان لەگەڵ دەكەن  
🔻 ئەوانەی ئەمڕۆ گلەیی دەكەن، بەشداربوون لەم شكستە، بۆیە تا زووە ئیعتیراف بكەن باشترە 
✍️ سەرتیپ جەوهەر
ناچاربوونی كاربەدەستانی هەرێم بەرادەستكردنی نەوت بەبەغدا، لە قازانجی خەڵكی كوردستانە، چونكە لانیكەم دەبێتەهۆی سەقامگیریی ئابوریی و دارایی و فەراهەمبوونی موچە بۆ فەرمانبەرانی كوردستان. مخابن بەهۆی خراپ بەكارهێنانی سامانی سروشتیی (نەوت) لەلایەن دەستەبژێری دەستڕۆیشتووی سیاسی لەكوردستان، زیانێكی ئێجگار گەورە بەژێرخانی ئابوریی كوردستان و سامانی نەوەكانی داهاتوو و ئایندەی سیاسی كوردستان گەیشت. 
دوای 10 ساڵ دەركەوت سەربەخۆكردنی ئابوریی، چ شكستێكی گەورەبوو. بەشێك لەدەستەبژێری سیاسی بۆخاتری بەرژەوەندی حزبیی و گیرفانی شەخسی خۆیان سامانی ژێر زەویان تاڵانكرد. ئەوە 10 ساڵە نەوتی كوردستان بەتاڵان دەفرۆشن، ئێستا ناچارن بیدەنەوە دەست بەغداو خەڵكیش زۆریان پێ‌ خۆشە، چونكە ئەوەی دەفرۆشرا هەڕاجكردنی سامانی . ئاخر لەمێژووی چ میللەتێك بووە لە %58ی داهاتی فرۆشتنی نەوت بدرێت بەكۆمپانیاو (ئەملاو ئەولا). ئەوەی لەچیرۆكی فرۆشتنی نەوتی كوردستان دەبیستین، بڕواناكەم لەلاپەڕەی مێژووی هیچ میللەتێك هەبێت. بەخەڵكیان وت نەوتەكە دەفرۆشین تا كوردستان سەربەخۆ بكەین، كەچی دوای 10 ساڵ تاڵانفرۆشكردنی نەوت، هەم نەوتەكەمان چوو، هەم سەربەخۆییەكە. 
بەر لە 10 ساڵ بەغدا ئامادەبوو بەبێ‌ دەرهێنانی ئەو سامانە، لەنەوتفرۆشتنی سەربخۆ پارەی زیاترمان بداتێ‌! ئێستا هەم ئەو سامانەی ژێر زەوی كە سامانی نەوەكانی داهاتوو بوو تەخشان و پەخشانكرا، هەمیش دەبێ‌ بە مەمنونیەوە نەوتەكە رادەستی بەغدا بكەن، چونكە هیچ دەریچەیەكیان لەبەردەم نەماوە.
لەوە خراپتر، نەوت بۆخۆی سامانێكی ستراتیژییە بۆ هەموو میللەتان. فاكتەرێكی گەلێك گرنگی سیاسەتكردنە، بەڵام لەدەستیدا. ئێستا دەبێ‌ جەماعەت نەوتەكە رادەستی بەغدا بكەن و ئینجا لەبەغدا بەمنەتەوە مشتومڕی بەشە بودجەشیان لەگەڵ دەكەن. پشكی هەرێم لە17% وە كردیان بە لە 12.6 و دەبێ‌ گەلێكیش مەمنون بن. 
ئەم رادەستكردنە، لەدوور مەودا، لەرووی ستراتیژییەوە زیانێكی گەورە بەهێزو دەسەڵاتەكانی هەرێم دەگەیەنێت، بەڵام خەڵكی كوردستان لێی بەرپرس نین، بەڵكو دەستەبژێری بڕیاربەدەستی حوكمڕانی هەرێم لێی بەرپرسن. لەم شكستەدا هیچ لایەنێك بەدەر نییە، هەموو ئەوانەی ئەمڕۆ گلەیی لەسەربەخۆكردنی نەوت دەكەن، بەشێك بوون لەبڕیاری سەربەخۆكردنی نەوت، خۆ ئەگەر بڕیار بەدەستیش نەبووبن، ئەوا وێنەیەكیان لەگەڵ جەنابی سەرۆك گرتووە، بۆیە تا زووە دەبێ ئیعتیراف بەو شكستە بكەن، والاعتراف بالذنب فضیلة.