بانگخوازی ئیسلامی و پەنابەرانی كورد لە ئەورووپا

1 مانگ پێش ئێستا

شاخەوان برایم عەبدوڵا
ئیسلامی سیاسیی كوردی، چەندان جار بۆ كۆمەڵگەی كوردستان گرفتن و بە گشتی سەرچاوەی هەڕەشەن، جارێك بە شێوەیەكی توندڕۆییانە ئایینداری دەكەن و هەموو چەمك و كرانەوەیەكی جیهانگەری كە دەكرێ بۆ پێشخستنی كوردستان سوودیان هەبێت، ڕەت دەكەنەوە و دنەی خەڵكی كوردی موسڵمان لە دژی حكوومەتی كوردستان دەدەن، بە پاساوی ئەوەی سێكۆلاریزم و دیموكراسی بڵاو دەكەنەوە، جارێكی تر هەر ئەو گرووپە ئیسلامییانە بە هەموو گڕوتین و شەوقێكەوە پاشكۆیەتی بۆ عەرەب و تورك و فارس دەكەن و دەبنە پردی ڕێكخراوە ئیسلامییەكانیان و بە داهات و سەرچاوەی مرۆیی كوردییەوە دەچنە خزمەت ئەو ڕێكخراوە ئیسلامییە عەرەبی و توركیانە، لەكاتێكدا كاتێك كوردستان دووچاری هەر جۆرە هەڕەشە و گرفتێكی سیاسی و ئابووری دەبێتەوە، یەك وڵات ئامادە نین هاوكاری كوردستان بكەن، بگرە هەوڵی سڕكردنی توانا و پێشخستنی كورد لە هەر شوێنێكی ئەو دونیا بەرینەدا هەبێت، دەدەن، چونكە تۆ وەك كورد دەبینن و لە ڕوانگەی ئەوانەوە تۆی كورد داوای سەربەخۆیی و جیاكردنەوەی خاك دەكەیت، بۆیە مافت پێشێل دەكەن و لە بەرانبەردا حەق بە خۆیان دەدەن بتچەوسێننەوە، ئەو ئیسلامییانەی كوردستان وێڕای ئەوەی ئەو ڕاستییە تاڵە دەزانن، كەچی بە پاساوی هاوئایینی، بوونەتە دەهۆڵكوتی تورك و عەرەب.
بۆ خۆم هانی هیچ كەس نادەم كۆچ بكات، لەگەڵ ئەوەی مافی هەر كەسێكە ئەگەر ژینگەی ژیانكردنی خۆی بەدڵ نەبوو، بیگۆڕێت، پێموایە مرۆڤ لە هەر كوێ ئاسوودە بێت، لەو شوێنەدا داهێنان و بەرهەمی زیاتری دەبێت، ڕەنگە تۆ لە وڵاتەكەی خۆتدا خاوەنی هیچ ئاییندەیەك نەبیت، بەڵام لە دەرەوەی وڵاتەكەتدا داهاتووت ڕوونتر بێت، ڕێك بە پێچەوانەوە زۆر كەس لە كوردستان خاوەنكار و سەرچاوەی داهاتیان هەبوو، بەڵام كاتێك چوونە ئەورووپا، هەموو شتیان لەدەستدا، جارێك ئەوەی لە كوردستان هەیان بوو، نەیانما، جاری دووەمیش لە دەرەوە نەیانتوانی خۆیان دروست بكەنەوە.
ئەم دوو نموونەیە بۆ ئەوەبوون كە پێوەرێكی دیاریكراو نییە ئایا تۆی هاووڵاتی كورد لە كوردستان یان لە ئەورووپادا داهاتووت باشتر دەبێت؟ ئەمە دەگەڕێتەوە سەر توانا و ئیرادەی خۆت، ئەگەر لێرە هەوڵی ڕژد بدەیت، دەبیتە خاوەن داهاتووی خۆت، ڕەنگە بەدەستیشی نەهێنیت، ئەگەر ئیرادەی خۆپێگەیاندنت نەبێت، ئەوە ڕوونە كە نابیتە هیچ! لەگەڵ ئەوەشدا بەشێكی هۆكاری سەركەوتن و شكستەكانت بۆ دۆخە سیاسی و كۆمەڵایەتییەكەی هەرێمی كوردستانیش دەگەڕێتەوە، ئەمەیش خاڵێكە و دەبێت بەهەند وەربگیرێت، بۆ ئەمەیشیان نموونە پێویستە، زۆر كەس هەبووە لە كوردستان هیچ دەرفەتێكی لەبەردەمدا نەبووە، كاتێك چووەتە ئەورووپا لەوێ پێشكەوتووە و بووەتە خاوەنی داهاتووی خۆی، ڕێك هی واش هەبووە، لێرە زۆر دەرفەتی لەبەردەمدا هەبووە، كەچی كاتێك چووەتە ئەورووپا، هەمووی دۆڕاندووە، هەموو ئەو نموونانە بۆ ئەوەن، مادام تۆی كورد بڕیارت داوە هەر دەچیتە ئەورووپا، پێویستە گوێ بە بانگخواز و حیزبە ئیسلامییەكان نەدەیت كە هانت دەدەن تێكەڵ بە كۆمەڵگە و ژینگەی ئەوێ نەبیت، ئەمە زۆر سەختە، دۆخە پەنابەرییەكەت زۆر لەوەی هەتە، سەختتر دەكات، بە پێچەوانەوە مادام تۆ هەر گەیشتوویتەتە ئەوێ، خۆت بونیاد بنێوە و بە هەموو شێوەیەك وەك هاووڵاتییەكی ئەو وڵاتە بەشداربە لە هەموو سێكتەر و دەرفەتەكانی ژیانكردن و خۆپێگەیاندندا، مافی ئامۆژگاریم نییە، ئەوە تێدەگەم كە نووسەر نابێت ئامۆژگاری كەس بكات، بەڵام ئێمە ڕەخنەی پیاوێكی بانگخواز دەكەین لەسەر ئەوەی ئامۆژگاری ئێوەی پەنابەر دەكات تێكەڵ بە ژینگەی ئەو وڵاتانە نەبن كە بۆی چوونە و لەبری ئەوەدا تەنیا سەرقاڵبن بە سەردانی مزگەوت و دامودەزگە ئیسلامییەكانەوە، بۆیە ئامۆژگاری بە ئامۆژگاری وەڵام دەدەینەوە.
بەوپەڕی ڕاشكاوییەوە دەڵێم ئەوەی ئەو بانگخوازە داوای دەكات، ژیانی ئێوەی پەنابەر لە ئەورووپا و وڵاتانی دیكەدا زۆر زۆر سەخت دەكات و ئەگەر بە گوێی بكەن، ناتوانن ئاسوودە بن، ڕێك بە پێچەوانەوە، ئێوەی پەنابەر كاتێك بە ئارەزووی خۆتان هاناتان بۆ ئەو وڵاتانە بردووە، پێویستە بە تەواوی لەگەڵ كولتوور و بازاڕ و دەستیكار و بۆنە و پێگە سیاسی و دەوڵەتدارییەكانی ئەو وڵاتانە خۆتان بگونجێنن، بەمجۆرە براوە دەبن، ئەگینا لە جیهان دابڕاو دەبن، بۆ ئەوەی دابڕاویش نەبن و ببنە مرۆڤی كاریگەر لەو وڵاتەدا كە وەك پەنابەر لێی نیشتەجێن، لە هەموو شتێكی ئەو وڵاتە بەشدار و چالاك بن، دەتوانن سەردانی مزگەوتیش بكەن، بەڵام نەك بەو جۆرەی حاجی كاروان باسی دەكات! بە تایبەتی ئەزموونی شكستخواردوویی زۆر كەس بۆ ئەوە دەگەڕێتەوە خۆیان نەخزاندووەتە ناوەندەكانی كاركردن و بەو بڕە پارە كەمەی لە ڕێگەی سۆشیاڵەوە چنگیان كەوتووە نەیانتوانیوە داهاتوویان دروست بكەن، هەروەها بەشێكیشی ئەوانەی چیرۆكی شكستخواردووییان دەگێڕنەوە، خۆیان لەگەڵ كولتوور و زمان و ژینگەی بازاڕ و كرانەوەی ئەوێدا ڕانەهێناوە و بە چاوی دوژمنكارانە سەیری هەموو شتێكی ئەو وڵاتەیان كردووە، لەوێ بیری توندڕۆیی ئایینی بەسەریاندا زاڵ بووە و ئەمەیش وایكردووە تێكەڵیان نەبن. كەوایە خاڵی شكستیان لەوەوە سەرچاوەی گرتووە، لەوێبوونە و لەوێش نەبوونە، ڕێك ئەوەیە ماڵوێرانی كاتێك ڕوو لە مرۆڤ دەكات، ئەوەی حاجی كاروان داوای دەكات، ئەگەر بە گوێی بكرێت، هەڕەشەیەك و داهاتوویەكی سەخت بۆ هەر پەنابەرێكی كورد لە ئەورووپا و جیهاندا دەخوڵقێنێت.
سەرچاوە:
كتێبی: ئازادی و مانەوە لە بازنەی چەقبەستووییدا.
نووسینی: شاخەوان برایم عەبدوڵڵا