بانگخوازی ئیسلامی و پەنابەرانی كورد لە ئەورووپا

1 مانگ پێش ئێستا

بەشی دووەم
ئەوەی وای كرد ئەو بەشە بۆ كتێبەكەم زیاد بكەم، خودی كۆچكردن نییە، چونكە ئەو بابەتە دەكرێ پرۆژەیەكی سەربەخۆی كاركردنم بێت، بەڵام كاتێك دەست و زمانی ئیسلامی سیاسی دەگاتە ئەورووپا و داوا لە گەنجان و هاووڵاتییانی كورد دەكات، تێكەڵ بە كولتوور و شێوە ژیانی ئەوێ نەبن، ئەوە خۆی هەڕەشەیە بۆ داهاتووی ئەو كوردانەی لە دەرەوە دەژین، بۆیە بە گرنگمزانی بە كورتی قسە لەسەر ئەو مەترسییە بكەم، بە تایبەتی هۆكارەكەی بۆ ئەوە دەگەڕێتەوە لەپڕ لە ڕێگەی سۆشیاڵمیدیاوە چەند خولەكێكم لە چاوپێكەوتنێكی حاجی كاروان بانگخوازی ئیسلامی و كادیری یەكگرتووی ئیسلامی كوردستان لەگەڵ كەناڵی سپێدەدا بینی، دەمودەست بڕیارم دا شتێكی لەبارەوە بنووسم، ئەگەر بە كورتیش بێت.
ئەو بانگخوازە ئیسلامییە، بێباكانە داوا لە هاووڵاتییانی كورد لە تاراوگە دەكات، لە چواردەوری مزگەوتەكاندا بژین و تەنیا سەردانی دامودەزگە ئیسلامییەكان بكەن، لەبری ئەوەی هانی هاووڵاتییانی كورد بدات خۆیان لەگەڵ ژینگە و  بازاڕ و كارسازی و پێگە سیاسییەكانی ئەو وڵاتانە ڕابهێنن و لۆبییەكی بەهێزی كوردی دروست بكەن، هاتووە داوایان لێ دەكات تەنیا بە سەردانی مزگەوت و دامودەزگە ئیسلامییەكانەوە سەرقاڵ بن. لەكاتێكدا كێشەی بەشێكی پەنابەرانی موسڵمان ئەوەیە، ناتوانن خۆیان لەگەڵ ئەو شێوە ژیانەی ئەورووپاییەكان بگونجێنن، ئەمەیش بەشێكی هۆكارەكەی دەگەڕێتەوە بۆ ئەوەی بە توندی كەوتوونەتە ژێر كاریگەری گوتاری نالۆژیكیانەی بانگخوازە ئیسلامییەكان، لەكاتێكدا هەر خۆیان هانایان بۆ باوەشی ئەو وڵاتانە بردووە و داوای شوێنی مانەوە و بژێوی و ئیقامەیان لێ كردوون. مادام ناتوانن خۆتان لەگەڵیاندا بگونجێنن، بۆچی دەچن؟ ئەوان لە ماڵی خۆیانن و تۆی موسڵمان بەزۆر خۆتت بە ماڵەكەیاندا كردووە! كەوایە هەر هیچ نەبێت، ڕێز لە كولتوور و شێوەژیانیان بگرە، بۆ ئەوەی ئەوانیش ڕێزت بگرن.
حاجی كاروان، بۆ هاووڵاتییانی كوردی تاراوگە دەڵێ: "هەتا مزگەوتی كورد هەبوو بڕۆن، زۆر پێویستە، چەند گەنجێك كە لە بەریتانیان، تەلەفۆنیان بۆ كردووم و گوتم بڕۆن بۆ مزگەوت، هیچ نەبێت مزگەوتە".
وەك ڕێزگرتن لە باوەڕی خەڵكی موسڵمان، لەم بەشەی كتێبەكەمدا، بە هیچ شێوەیەك دژایەتی مزگەوت ناكەم، بەڵكوو بە تێگەیشتن لە دۆخی پەنابەرانی كورد لە ئەورووپادا، بە مافی خۆمی دەزانم سەرلەبەری ئەو داوایەی حاجی كاروان ڕەخنە بكەم. بۆچی؟ ئەگەر گەنجان و هاووڵاتییانی كورد لە ئەورووپا تەنیا لە مزگەوت بژین و بە هیچ كارێكەوە سەرقاڵ نەبن و خۆیان لەگەڵ ژینگە نوێكەدا نەگونجێنن، بێشك دووچاری گرفتێكی گەورەی ژیانكردن دەبن و ناتوانن بژین، دوای ماوەیەك دووجار دەبنە قوربانی، جارێك لە كۆمەڵگەكەی خۆیان دابڕاو و جاری دووەمیش كە ئەمەیان بۆ پەنابەران زۆر سەخت و مەترسیدارە، لە كۆمەڵگەی ئەورووپایی دادەبڕێن، ئینجا ئەوێیەك ئەگەر ئیش نەكەیت و نەخوێنی و زمان نەزانیت، تەنانەت بچووكترین كارت چنگ ناكەوێت، خۆ ئەگەر كاریشت نەبێت، ناتوانیت بژیت، لێرەدا ئەوە وەك یاسای بیركاری وایە، 1+1 دەكاتە 2، كەوایە ئیشنەكردن یەكسانە بە ژیانێكی سەخت و شكست.
لە بەشێكی تری چاوپێكەوتنەكەیدا لەگەڵ "كەناڵی سێپدە"ی یەكگرتووی ئیسلامی كوردستان، ئەو بانگخوازە ئیسلامییە، داواكەی فراوانتر دەكات و دەڵێ: "پێویستە خێزانەكان (مەبەستی ئەو خێزانانەیە كە لە ئەورووپا و وڵاتانی دیكە پەنابەرن) لە دەوری مزگەوتەكان كۆببنەوە و وانە بۆ منداڵەكان دابنێن، ئەگەر مزگەوتیش نەبوو، بەدوای دامودەزگەی ئیسلامیدا بگەڕێن، ئەگەر هی عەرەب بوو، هی تورك بوو، تەنانەت هی ئەلبانیش بوو، ئەو خاڵە زۆر زۆر گرنگە كە لەوێ خۆت بزر نەكەیت و تەنازول لە دین نەكەیت". 
كێشەی كورد، كێشەیەكی ئایینی نییە، ئەگەر مزگەوتی چنگ نەكەوت، بزر ببێت، بەڵكوو كێشەیەكی نەتەوەیی هەیە و دەوڵەتە ئیسلامییەكانی وەك عێراق و ئێران و سووریا و توركیا كە چوارەمیان پاشماوەی دوایین دەوڵەتی خەلافەتی ئیسلامییە، ئەوەیە ناتوانن كورد وەك نەتەوەیەكی سەربەخۆ قەبووڵ بكەن، ئەو چوار دەوڵەتە، كورد لەبەر جیاوازی ئایینی ناچەوسێننەوە، بەڵكوو تەنیا لەبەر ئەوەی كوردین و داوای مافی دەوڵەت و ژیانی سەربەرزی و سەربەخۆیی دەكەین، دەمانكوژن و دەمانچەوسێننەوە و خاكمان داگیر دەكەن و ڕووبارەكانمان وشك دەكەن، بۆ ئەوەی نەژین و كۆچ بكەین! وێڕای ئەوەی لە ڕووی ئایینییەوە كورد پابەندە بە ئیسلام و موسڵمانە، كەچی هێشتا ئەو چوار دەوڵەتە ئیسلامییە، بەردەوامن لە دژایەتیكردنی كورد و چاویان بە پێشكەوتن و تەنانەت ژیانی سەقامگیریی هەرێمی كوردستان و تۆی كورد لە هەر كوێ بیت، هەڵنایەت. 
تۆ جوان دیقەتی داواكەی ئەو بانگخوازە ئیسلامییە بە ڕەگەز كورد و سەر بە ئیخوانییە بدە، لەبری ئەوەی داوا لە كوردانی تاراوگە بكات، ئەو هێزە زۆرەی كورد كە لەوێن، یەكبگرن و پرسی كورد بە شەقامی ئەورووپایی بناسێنن، كەچی هاتووە داوا لە خێزان و كۆچبەرانی كورد دەكات، ژیانی خۆیان لە نزیك مزگەوتەكان بەسەر ببەن و سەردانی دامودەزگە ئیسلامییەكان بكەن، تەنانەت ئەگەر هی عەرەب و توركیش بن.
ئەو زۆر باش دەزانێت هەر دامودەزگەیەكی ئیسلامی كە لەلایەن فارس و تورك و عەرەبەكانەوە لە ئەورووپا یان وڵاتانی تر دامەزراون، ڕاستەوخۆ بۆ خزمەتی نەتەوەی خۆیان، واتە فارس و تورك و عەرەب دامەزراون و پێش ئەوەی ئایینداری بكەن، ناسیۆنالیزمین و فیكری ڕاسیزمی بڵاو دەكەنەوە، بە هەموو شێوەیەك لە پەنای ئاییندا بۆ بەرژەوەندیی سیاسەتی وڵاتەكانیان كار دەكەن، كەچی ئەو بانگخوازە ئیسلامییە بە ڕەگەز كوردە، بێباكانە داوا لە تاكی كورد دەكات، لە تاراوگە تەنیا سەردانی دامودەزگەی ئیسلامی بكەن، تەنانەت ئەگەر لەلایەن عەرەب و توركەكانیشەوە سەرپەرشتی بكرێن و وانەی ئایینی بۆ منداڵەكانیان دابنێن، وەك ئەوەی ئێمەی كورد بە درێژایی مێژوو، سوودی زۆرمان لەو وڵاتە ئیسلامیانە وەرگرتبێت!
سەرچاوە:
كتێبی: ئازادی و مانەوە لە بازنەی چەقبەستووییدا.
نووسینی: شاخەوان برایم عەبدوڵڵا