سەرپۆشەكەی سەری ژینا

3 مانگ پێش ئێستا

دابان خەسرەو
دوێنی بینیم لە ناوەندی دڵی شاردا
سەمای دەكرد لە شەپۆلی پێكەنینا
چ سەمایەك 
لەگەڵ هەر خۆ بادانێك دا
شیعرێك بە بەرگی ئاڵ و واڵاوە
مۆسیقایەك پڕ بە گوێچكەی كۆمەڵگاوە
دەكەوتنە خوار

سەرپۆشەكەی سەری ژینا
پڕ لە تابۆ و حەرام و حەڵاڵی دینا
شیتاڵ شیتاڵ
شەبەق شەبەق هەموو جەستەی لە برینا
دەستێكی ڕەش سەرێك پڕ پڕ لەتاریكی
چاوی مۆسیقایان بەست و
شیعریان گلاند لەناو قیژە و گریان و ماتەم و شینا

ئەوەی یەكەم چەقۆی چەقاند لەسەر دڵی
ناسیمەوە خۆی بوو
 ئایدۆلۆژیای كوێر و كەڕ بوو
دژ بەجوانی و ئیستاتیكا و 
مەیلی خوێنی تازە و تەڕبوو
چەقۆی یەكەم عەمامەیەك بەسەریەوە
عەبایەكی لەبەردابوو خۆڵەمێشی
دڵی ئازادی دابوو بەسەر دەستی داو
ژەهری مەرگی پێ ئەنۆشی.

چەقۆی دووەم بۆینباخێكی سوری درێژ لەملیدا
پاش تێڕامان دڵنیابووم كە ئەمناسی
بزەیەكی سادیزمی سارد لەسەر لێوی
بەڵێ خۆی بوو درۆی گەورە دیموكراسی