خۆزیا خوشكانی یەكگرتو قسەیان نەكردایە!

3 مانگ پێش ئێستا

بارزان شێخ عوسمان
هاوڕێ و برای ئازیزم تێكۆشەر و پێشمەرگەی دێرین كاك سەركۆی عوسمان میرزا لە واڵەكەی خۆی لە فیسبوك، پلارێكی كورت و زۆر بەهێزی سەبارەت بە بەیاننامەكەی خوشكانی یەكگرتوی ئیسلامیی بڵاو كردبوەوە.منیش كۆمێنتێكم نوسی، بەڵام بەیاننامەكە هێندە كاریكاتۆریانە و لاواز بو كە هەر كۆمێنتەكە بەس نەبو (دیارە دەستەیەكی سەر بە یەكگرتوی ئیسلامیی دەبێت هەروا هەڵوێستی شەرمنانە و هەڕەشە ئامێز بنوسێت).

زیاتر ئەوەی خوشكانی ئەم حزبە ئیسلامییەی هانداوە بەیاننامە بڵاو بكاتەوە مەسەلەكە ئەوە نییە دژی كوشتنی ئەو ژنە هەڵوێست وەربگرێت، بەڵكو لەبور ئەوەیە حوكمەتێكی شیعە بەرپرسیارە دەنا ئەگەر لە سعودیەی عەرەبیی یا ئیمارات یاخود قەتەڕ و توركیای ئیخوانچی بوایە ئەگەر دەستخۆشییان نەكردایە ئەوا هەر گوێیان پێ نەدەدا.ئەوە بۆچی ئەو خوشكە ئیخوانچیانە هیچ بەیاننامە و هەڵوێستێكیان نەنواند لە ئاست كۆمەڵكوژییەكانی داعش لە شەنگال و فرۆشتنی ژنان و كچانی شەنگالیی لە بازاڕی نەخاسە وەك سبایا هەڕاج دەكران و ئاڵوگۆڕیان پێ دەكرا؟!.
ئەوە بۆچی لە ئاست رەشە كوژیی ژنان لە هەرێمی كوردستان و عێراقیش هیچ قسەیەكیان نییە؟!.

ئەو دەستەی خوشكانە ئیسلامییانە مافی خۆیانە بێ دەنگ بن چونكە شەرع و ئاینەكەیان لە پیاو سالاریی بەرهەمێكی تری پێ نییە.
بەڵام كە دێنە دەنگ و بەگژاچونەوەی روسەریی و حیجاب ئیدانە دەكەن و بەپێشیلكردنی ئازادیی موحەجەبەكانی لەقەڵەم دەدات، رێك ئەو پەندە عەرەبییە بەسەر ئەو دەستەیەدا دەچەسپێت كە دەڵێت سكت دهرا و نگق كفرا. خوشكانی ئازیز بەو قسەیەتان زۆر مەسەلە دەوروژێنن .ئێوە و حزبەكەتان دەڵێن سەپاندنی ئاین (كە حیجاب بەشێكە لەو ئاینە) پێچەوانەی چەمكەكانی قورئانە وەك ئەوەی خۆتان هاوكات لەگەڵ حملە ئیمانییەكەی سەدام دا دەستتان نەكرد بە سەپاندنی حیجاب، بە تفەنگ و شەق نا، بەڵكو بە مەرجەكانی خێر بەخشینەوە و هەتیوانە و فەقیرانە دەستتان پێكرد ئەو ناڵ و ژن و كچ و ژوڕانەی نەدەبون بە پێڕی ئێوە جارێكی تر چاوی بە پلە گۆشت و فلسێكی سور نەدەكەوت . دواتریش بە كردنەوەی ماڵەكان بۆ فێربونی دەرس و بەشودانی كچان و بێوەژنانی فێرخواز بە پیاوانی جیهادی نەرمو نیانیی،پاش ئەوەش دەستتان كرد بە بڵاوەپێكردنی مامۆستا ئیسلامییەكان بە گوند و كۆمەڵگەكانی نیشتەجێ بون و قوتابخانەی ناوچە هەژار نشین و شەعبییەكان تا ترس و خۆفی ئەو دنیا وەك ژەهر بكەنە مێشكی مناڵانی كچ و كوڕ .بەڵێ ئێوە و حزبەكەتان دەستتان خۆش بێت بۆ ژەهراوی كردنی كۆمەڵ بەو ئسلوبە نەرمو نیانییە بەو غەزوە نەرمو نیانییەی ناوتان نابو میانڕەوی، بەو مەشق و راهێنانە بە نەرم و نیانی و بێ زۆرەملێی تا لە دواییدا ئامادە بن بۆ بەشی دوەمی تراژیدیای گەمژاندنی خەڵك و جیهادی وەك حەرەكە و دەستە ئیسلامییە چەكدارەكان، قاعدە و داعش، یاخود ساز و ئامادە بن لە رێی دیموكراسییەوە بچنە سەر كورسیی حوكم و ئەو كاتە شەریعەتەكەی ئیسلام وەك خۆی جێ بەجێ بكەن .

لە بەیاننامەی ئەو خوشكە ئیسلامییانەدا دەستەواژەی (لا اكراە فی الدین )بەكار هاتوە،بەڵێ پێغەمبەری ئیسلامیش تا لە مەككە بو وای دەوت، ئەی كە چوە یەسریب و دینەكەی لە پەیقەست بونی تاك و دروستكەرەكەیەوە گۆڕی بۆ ئیسلامێكی سیاسیی چی كرد؟!، دەوڵەتی سیاسیی و دینی پێكهێنا، بۆ ئەوەش پەلاماری دەقروبوری دا، تاڵانیی كاروانی بازرگانیی كرد، بەشمشێر و تیرو كەوان ئەوانیتری كردە ئیسلام تەنانەت هەڵی كوتایە سەر جوەكان و فەلەكانیش لەو ناوچەیە تا جگە لە شەرع و حوكمەكەی ئیسلام هیچ شتێكی تر نەناسرێت، بەوەش ئیتر(لا اكراە فی الدین )نەما و بەسەرچو . خومەینیش هەمو هێزە شیوعی و ماركسیی و چەپ و دیموكراتییەكانی دڵنیا كردەوە كە هەقی سیاسەتی نییە، كەچی وا چل و سێ ساڵە ئیسلام حوكمی وڵات دەكات . مەهستا یا ژینا خانم بۆچی كوژرا ئایا هەر لەسەر ئەوە نەكوژرا كە قژی نەشاردۆتەوە؟! كەواتە بۆچی توڕ هەڵدانی حیجاب و سوتاندنی ئەو قوماشە نەفرەت لێكراوە پێشێلكردنی هەستی ژنانی موحەجەبەیە، لە كاتێكدا حیجاب رەمزی خۆ جیاكردنەوەی كەسانێكە لە خەڵكی تر بەو حسابەی موحەجەبە پاكیزەتر و شەریف ترە لە ژنان و كچانی قژ دانەپۆشراو .

ئێوە كە بەو حیجابە خۆتان پێ باشتر،  پاكتر و ئیماندارترە و لە نێو مێگەلی گەمژەكاندا سیمبولن،  ئاماژەیەك نییە كە (لا اكراە فی الدین ) ناخوات و باوی نەماوە، ؟!. بە و پێ یە بێت ژنان و كچانی بیست و شەش ساڵ لەمەوبەر پێش هەڵتۆقینی حزبەكەتان و بە ئاشكرا كاركردنتان، نوێژ،  حەج و رۆژوەكانیان وەرنەگیراوە چونكە موحەجەبە نەبون، جلی نوێژیان لەبەر نەدەكرد لەكاتی نوێژ دا، بۆیە ئێستا هەمومان دەبێت بۆ دایك و نەنك و ژنان و كچانمان كە نوێژیان كردوە و و رۆژو یان گرتوە یا حەجیان كردوە بگرین .

بۆیە خۆزیا خوشكانی یەكگرتو هەر بێ دەنگ بونایە، تا برینەكەی كەسوكاری خەمباری ژینا خانم هێندەی تر بریندار نەبوایە تا ئێمەش لاپەڕەیەكی تری خۆسەپاندن و خۆ بە باشتر و پاكتر زانیەكانی ئێوەمان هەڵنەدایاتەوە. تا ئێمەش وەك مامۆستا مەریوان وریا قانع فەرموی "بۆیە لەشی دینیی بەگشتیی، بە تایبەتیتر لەشی دینیی ژن، زمانی سەرەكیی قسەكردنی ئیسلامی سیاسییە لەگەڵ ئەو كۆمەڵگایانەدا كە دەچێتە ناویانەوە. لەشی ژن لە ئیسلامی سیاسیی بسێنیتەوە، كەلێنێكی ھێجگار گەورە لە زمانی قسەكردنیاندا دروستدەبێت و لەزۆر سەرەوە لە قسەكوتن دەكەون. "