سەرسامبون بە بۆردومانی توركیا!

3 مانگ پێش ئێستا

هێژا دڵشاد
ئەو كۆمەڵگەیانەی كە خاوەنی كلتور و فەرەهەنگی خۆیانن، هەمیشە برەو بە ناساندنی كلتوری خۆیان دەدەن، هوشیارن لە هەر هێرشێك و پاكتاوێك بۆ سەر نەتەوە و كلتورەكەیان. هەرچەندە مەرج نیە هەموو كۆمەڵگەیەك هوشیار بێت و خاوەن هەڵوێست و ئیرادەی خۆی بێت لەبەرامبەر داگیركاریی و سڕینەوەی شوناسەكەی.
 لە وڵاتێكی وەك توركیا، خاوەن فرە كلتورێكی تێكەڵە لە میللەتانی ناوچەكە كە باكگراوندەكەی بۆ مێژووە عوسمانییەكەی دەگەڕێتەوە، هەمیشە لە هەوڵی ئەوەشدایە خۆی خاوەندارێتی كلتورەكانی میللەتانیش بكات و بەهی خۆی بزانێت. بەشێكی زۆر لە توراسە مێژووییەكەی هونەرەكەی لە عەرەب و فارسەوە وەرگیراوە، بەشێكیتری لە كوردییەوە وەرگیراوە.
لەم ساڵانەی دواییدا، لە باشووری كوردستان، رادەبەدەر جۆرە تەقلیدكردنەوەیەكی توركی دەبینرێت، لە ستایلی ژیانەوە تاكوو موزیك و كایەكانیتری هونەر و هتد.. بەداخەوە دەیان درامای توركی لە كەناڵە كوردییەكان بەبێ‌ فلتەر و بەبێ‌ هیچ بنەمایەك نمایش دەكرێت.درامای توركی لە 15 ساڵی رابردوودا، بازاڕ گەرمییەكی بۆ خۆی پەیدا كردووە، لەوڵاتانی عەرەبی و رۆژهەڵاتی ناوەڕاستدا، ئەوەی لێرە هەیە ئەو وەرگرتنە خراپەیە لە درامای توركییەوە بۆ ناو كۆمەڵگەی ئێمە دێت، لە ستایلی ژیانەوە، پۆشاك، تەنانەت لە ناوی كەس و شوێنەكانیشدا دەبینرێت.
رۆژانە زۆرێك لە شوێنگەكان ناوی توركییان لێدەنرێت، ئارایشتگاكان، سەرتاشەكان، چێشتخانەكان، دوكانی شیرینی و كافێ‌ و رێستۆرانتەكان، بەڵام هەموو ئەمانە لەپای چی؟ ئایا ناوی توركی بێت مانای وایە كەشخەترە؟ یاخوود باشترە؟ شتەكە بۆتە چاولێكەری و جۆرێك لە تەقلیكردنەوەیەی بێ بنەما و بێ مانا. جۆرە تەقلیدكردنەوەیەك لە فۆڕم و مەسرەفگەرایییەكی رادەبەدەر. زۆرێك لە گۆرانیبێژە كوردییەكان موزیك و ریتمی توركی وەردەگرنەوە. دەیان و سەدان گۆرانیبێژی كورد، بێ مەعریفانە كۆپی موزیكی توركی دەكەنەوە، ئەمانە هیچ پێوەرێكیان بۆ هونەر نییە و وەك هونەرمەندیش دەناسرێن!
لەكاتێكدا لە توركیا  ناوی كوردی یاخوود بەكارهێنانی پیتی كوردی لە شوێنگەیەك لە هەر شارێكی توركیا بێت، قەدەغەیە و بەهیچ جۆرێك رێگەپێدراو نییە. لە توركیا شوێنگە هەیە بەناوی عەرەبی، فەرەنسی، ئینگلیزی، فارسی و زمانیتر، بەڵام بە زمانی كوردی قەدەغەیە، لەبەرئەوەی بە زمانی تیرۆر ناسراوە، زمانی 20 ملیۆن كورد لە وڵاتە روبەڕووی نكۆڵی و رەتكردەوە دەبێتەوە، بەمەش شوناسی میلەتێك دەسڕێتەوە و ناتوانێ كلتوركەی پێش بخات. ئەمەش وادەكات ئێمەی كورد جارێكتر بیر بكەینەوە لەوەی هیچ نەبێت تەقلیدی توركی نەكەینەوە.
زۆرێك لە سایتە كوردییەكان، هەواڵ لەسەر ئاكتەرە توركەكان دەكەن لەكاتێكدا بەشێك لەوانە بە رەچەڵەك كوردن و نكۆڵی لە شوناسی خۆیان كردووە،
لێرەدا سەرسامبون بە تورك، بە توركیا، بە ستایلی ژیان، بە كلتور و مۆدێل و گەشت كردن بۆ توركیا رادەبەدەرە، هەموو ئەمانە لە هۆكاری ئەوەیە تاكی ئێمە لە فەراغێكی گەورەی ژیاندایە، فەراغی كلتوور، فەرەهەنگ، فەراغی ئیش و مشغوڵییەت.
تەنیا لە جەژنی قورباندا 108 هەزار تكتی فڕۆكە بۆ توركیا بڕاوە، هەر كەسێك لایەنی كەم1000 دۆلاری خەرجكردبێت دەكاتە 108 ملیۆن دۆلار، لەكاتێكدا ئەوەندەیتریش بە رێگەی وشكانی سەفەریان بۆ توركیا كردووە.
ئێمە رۆژانە هەوڵی بۆردومانەكانی فڕۆكەی توركی دەبین لە باشووری كوردستان. ئەم پارادۆكسەی میللەتی كورد لە باشووری كوردستان، لەنێوان بۆردومان و سەرسام بون بە توركی، دەبینین تادێت جۆرە سەرسامبونێك بە بۆردومانی و داگیركاریی توركیا، پێویست بوو لەبری بایكۆت كردن زیاتر سەرسامبون بە توركی و ستایلی توركییەوە هەیە.