بۆچی بریاری یەكتاپۆشی بۆ خوێندكارانی زانكۆ گرنگە؟

1 مانگ پێش ئێستا

سەڵاح قەیتوولی ..
ماوەیەكە باس لەوە دەكرێت كە ساڵی خوێندنی(2022-2023)لە بەشێك لە زانكۆكانی هەرێمی كوردستان شێوازی یەكتاپۆشی پەیڕەودەكەن بۆ ئەوەی بەجۆرێك دیاردەی چینایەتی كۆمەڵایەتی كەمبكرێتەوە ..
لەراستیدا بەندە بەكارێكی باشی دەزانم كە پێشتر لەزانكۆی بەغدا بووم سوودەكانی یەكتاپۆشیم بینی، ئەو كاتەی ئێمە لەوێ‌ یەكتاپۆشی (زی موحد) باوبوو رێگە نەدرا خوێندكار بەئارەزووی خۆی جلی جۆراوجۆر و مۆدیلات لەبەربكات، هەرچەندە ئێمە لەسەرەتاوە لە قۆناغی یەكەم تۆزێك لامانەوە قورس بوو بەڵام دوواتر راهاتین و سوودەكانی بۆمان دەركەوت كە (یەكتاپۆشی)لە بەرژەوەندی هەمووانە لەبەر چەند هۆكارێك:
1-ماوەی هەرساڵێكی خوێندن تەنها (2) دوو یان (3) سێ‌ كراس و (2)دوو پانتۆڵ و(1)یەك یان دوو چاكەت و قەمسەڵەیك و بلوسێك مان لەبەردەكرد و هەژارو دەوڵەمەند تارادەیەك لەیەك جیانەكرانەوە كە لەراستیدا كارێكی باشبوو هەم لەرووی ئابووریەوە هەمیش لەرووی كۆمەڵایەتیەوە بەتایبەتی بۆ خوێندكارە هەژارەكان و دۆڵەمەندەكان ئینجا خوێندكاری  كچ كە رێگە نەدرا بەئارەزووی خۆی جلی ئاڵ واڵ و رەنگاورەنگ لەبەركات وكۆلێژ ببێتە شوێنی نمایشكردنی جلوبەرگ تەنانەت بۆیان نەبوو ئاڵتوون وزێڕ بۆ خۆرازاندنەوە بەكاربێنن ..  
2-جلی یەكتاپۆشی (زی موحد) پێكهاتبوو لە پانتۆڵی رەساسی (سلڤەر)ی و كراسی سپی و لە وەرزی زستانیش (چاكیت)ی شین یاخود (قەمسەڵە)،..
3-ئینجا كاتێك رۆژانی دەوام ئەو جۆرە جلانەمان لەبەردەكرد پێویستبوو پاكوخاوێنی جلەكانمان رابگرین و بیانپارێزین و هەمیشە بە ئوتووكراوی و بە بۆنخۆشی دەمانەوە بەتایبەتی كراسی (سپی)كە زوو بەزوو چڵكنیەكەی دەردەكەوت ..
4-كاتێك ئێمەی خوێندكار بەو جلانەوە دەچووێنە دەرەوەی زانكۆ زۆربەی خەڵكی زانیان خوێنكاری زانكۆین و رێزمان لێدەگیراو خۆشمان بە وریاییەوە هەڵسوكەوتمان دەكرد ..
5-بەگشتی یەكتاپۆشی (زی موحد) تا رادەیەكی زۆر وای لە خوێندكاران كردبوو (كوڕان و كچان) زیاتر گرنگی بەخوێندن وسەعی كردن بدەن لەباتی بیركردنەوە لەجل گۆڕین وجل لەبەركردنی مۆدیلات ..!!