گلەیی كوردبوون لە تاڵیبانەكانی كوردستان مەكەن

1 مانگ پێش ئێستا

شەماڵ بارەوانی
هیچ پێویست ناكات گلەیی كورد بوون لە بابایەكی ئیسلامی سیاسی و تاڵیبانەكانی كوردستان بكەیت و بڵێیت چۆن بوێری وا دەكەیت كفر و بێ ڕێزی بە پیرۆزی خاكی كوردستان بكەیت و بڵێیت:خاكی عەرەب و سعودیە لە كوردستان پیرۆزترە؟!
ئەوانە مەعدەنیان دیارە كەچین و لە كوێ ئاو دەكرێت بە ئاشی ئیدەلۆجیاكەیان.
ئەوان لەمێژە و بە ئاشكرا جاشی عرووبەن و خزمەتی ئەجێندای نەیارانی كورد دەكەن و شەڕی بە وەكالەت بۆ پڕۆژەی تەعریب و هزری فێندەمێنتالیستی دەكەن.

ئەوان بۆ خەمی خاك و دەوڵەتی كوردی و لە پێناو كوردستانی گەورە و بۆ كوردایەتی درووست نەبوون هەرگیز.

لەمێژە هەستی نەتەوایەتی بە بیدعە و بیری ناسیۆنالیستی بە دەستی ئیمپڕیالیزم و دەسیسەی جولەكە و پیلانی غەربی كافر دادەنێن بۆ پارچەپارچەكردنی خاكی ئیسلام و پەرتكردنی یەكڕیزی برایانی عەرەب و ئەفغانی و شیشانی و خەلیجی و توركی و پاكستانی موسڵمان.

كاكە گیان لە عەقیدە و بیر و باوەڕی ئیسلامی سیاسیدا شتێك نییە بە ناوی كوردایەتی و هەستی نەتەوایەتی و ئەوان باوەڕیان بە چەمكی(ئوممەی ئیسلامی هەیە).

بۆیە هەرگیز چاوەڕێ مەكە ئەمیر و ئەمیندار و ڕابەرەكانی ئیسلامی سیاسی و دەروێشەكانیان بێن و ببن بە پاڵەوانی هەستی ناسیۆنالیستی، ببن بە خانی و جەلادەت بەدرخان و قازی و، واعیز و مەڵا و دكتۆر عەبدولواحیدەكانیان ببن بە نەتەوەپەروەری تەمام عەیار و، چیتر دەستبەرداری سوكایەتیكردن و بێ ڕێزیكردن بن بە كوردایەتی و خاك و چەمكی پێكەوە ژیان و فرەیی و یەكترقبوڵ كردن و زەردەشتیەكان و ئێزدی و مەسیحی و جو و بێ دین و هەموو جیاوازیەكان.
هەرگیز، لەخەیاڵیش چاوەڕێی وەها شتێك مەكە.

ئەزیزم من لەوتاریتریشدا گووتوومە و لێرەش دەیڵێمەوە: ئەوان بۆ كوردایەتی درووست نەبوون، بەڵكوو بۆ زیندووكردنەوەی خەلافەتی ئیسلامی و ڕۆنانی دەوڵەتێكی سیوكراتی و جێبەجێكردنی ئەحكامەكانی شەریعەت و بە ئایینكردنی تەواوی سێكتەرەكانی ژیان درووست كراون.

گەر ئێستا لە ژێر دیفاكتۆ و ئەمری واقیعدا، جار و بار، لێرە و لەوێ باس لە كورد بوون و دەوڵەتی كوردی دەكەن، دڵنیابە ئەوە هەمووی تاكتیك و فێڵ و ناچارییە. بە ڕووكەش دەوڵەتی كوردیشیان بوێت و سەتجار پشگیری سەربەخۆیی و ڕیفراندۆمیش بكەن، درۆی دەكەن و دەوڵەتێكیان دەوێ موتوربەی دۆگمەكانی سەید قوب و بیری ئیخوانچیەتی و ئیدەلۆجیای حەسەن بەنا بێت و حوكمی مەزهەبی و فیقهی ئیسلامی و ئەجێندای ئیسلامی سیاسی تێدا باڵادەست و یاسا و سەروەربێت بێت.

خۆ بینیمان كاتێك كوردانی ڕۆژئاوای كوردستان لەساڵی٢٠١٣ پرۆژە دەستوورێكی شارستانی و مەدەنیان نووسی و دانیان بە یەكسانی جێندەری و ژنبوون دانا، وەكو مرۆڤ و یەكسان بە پیاو، نەك هاوشێوەی ئیسلامی سیاسی وەكو بوكەڵەی ئارەزوو و ئامێری جنس و كەنیزە و چوار ژن بە پیاوێك و نیوە میرات و بەكەم ئەقڵ و نامرۆڤانە و لە ڕوانگەیەكی زۆر نزم و نێرسالارانە سەیری ژن بكەن! ، چۆن لێرە یەكگرتووی ئیسلامی و عەلی قەرەداغی ئیخوانی قەتەری زیڕەیان كرد و هاواری ئیدەلۆژیایانە و مەزهەبیانە و پاتریاركیانە و فێندەمێنتالیستانەیان لێ بەرزبووەیە و بەیاننامەیان لە دژ دەركردن و پڕۆتێستۆ و سەرۆكەنەیان كردن و ئەو پرۆژە دەستورەیان بە دژایەتی كردنی خودا و ئایین یەكسان و پێناسەكرد!

ئەزیزم ئەوەیە حەقیقەتەكە:
ئەوان بیر و هۆشیان لای تاڵیبان و چاویان پڕ فرمێسكە بۆ جەوهەر دۆدایڤی تیرۆرستی شیشانی و دڵیان بۆ حەماسی تیرۆرست و حەرەكەی جیهادی فەڵەستین و ئیخوانی میسر لێدەات و ئاواتیان ئازادبوون فەڵەستینی ئومەی عەرەبیە و سەریان لە كۆشی ئیخوان و گیرفان و قنیان لە باوەشی كۆماری سێدارە و ئاخوندەكانی ئێرانە.

من بۆ ماوەی چەندین ساڵ لەناو حزبێكی ئیسلامی بووم و ئەندامیان بووم و وانەی ئوسرە و دەرسی تەنزیمی حزبم لایان خوێند و بە دۆگم و ئایدەلۆجیای ئیسلامی سیاسی تەڵقینیاندام،
ڕۆژێك باسی شێخ سەعیدی پیران و سەید ڕەزای دێرسمی و سمكۆی شكاك و كوردایەتی و دەوڵەتی كوردیان بۆ نەكردم، لە بەرامبەردا مێشكیان كاسكردم بە ناوی حەسەن بەناو سەید قوتب و سوڵتان عەبدولحەمیدی عوسمانی و ئەبو ئەعلای مەودودی و فلانی ئەفغانی و فیساری پاكستانی و كێی میسری و ئەویتری سودانی و كاتێك باسی كەمال ئەتاتورك و تۆرانیەكانیان بۆ دەكردین، بەیەك وشە و یەك دێڕ باسی ئەو هەموو ستەم و زوڵم و فریوەی دەرهەق بە كورد و قەدەغەكردنی زمانی كورد و كپكردنەوەی شۆڕشی شێخ سەعیدی پیران(١٩٢٥) و ئاگری داغ(كۆماری ئارارات) (١٩٢٧-١٩٣٢) و سەركوتكردنی ڕاپەڕینی یەكەمی كۆچگیری(١٩٢٠-١٩٢١) و ڕاپەڕینی دووەمی كۆچگیری(دێرسم) (١٩٣٦-١٩٣٨) و جوڵانەوەی پلومەر (١٩٣٠)و جوڵانەوەی كۆچ ئوشاغی(١٩٢٦) و كۆمەڵكوژی و جینۆسایدی دێرسمیان نەدەكرد، بەڵكو تەنها باسی ئەوەیان بۆ دەكردین كە ئەتاتورك كەسێكی بێ دین بوو و خەلافەتی ئیسلامی هەڵوەشاندەوە و لیباس و جبە و عەمامەی عەرەبی مەڵاكان و بانگی بە زمانی عەرەبی قەدەغەكرد و دژایەتیەكی زۆری ئاینی كرد و هەر لەو سۆنگەیەشەوە، ڕقیان لە ئەتاتورك دەبوویەوە، نەك لەبەر ئەوەی دژایەتی كورد و كوردستانی كرد و كەمالیەكان چۆن لە ڕێگای تیرۆری دەوڵەتەوە كوردستان و كوردیان خەڵتانی خوێن كرد.

بۆیە دڵنیابە، كامەیان لە هەمووی زیاتر خۆی لا مەدەنیترە(وەك ئەوەی هەندێكیان وا خۆیان ناوزەددەكەن) لە هەمووی داعشترە، بەڵام كاتێك حوكم بكەوێتە دەستیان و دۆخەكە لە بەرژەوەندی ئەواندابێت و هێز و دەرفەتیان هەبێت.
بەڵێ تەنها دوو ڕۆژ بەسیەتی بۆ بە داعشكردنی كۆمەڵ و سەپاندنی شەریعەت و جێ بەجێكردنی ئەحكامەكانی شەریعەت، كە ئیسلامی سیاسی حوكم بكەوێتە دەستیان.