كــوینتین تـارانتینۆ، رەنگـــە زۆر كاریگەر بووبێت بە فـیودۆر دۆسـتۆیـڤیسكـی

1 مانگ پێش ئێستا

شادمان محەمەد
بە ڕای خۆم، لە ساتی خوێندنەوەی هەندێك لە نوسین و رۆمانەكانی نوسەر مەزنی ڕووسیایی (فیودۆر دۆستۆیڤیسكی)، هەروەها تەماشاكردنی هەندێك لە فیلمە تایبەت و جیاوازەكانی دەرهێنەرە جودا و یاخیبووەكەی هۆلیوود(كــوینتین تارانتینۆ)دا، دركی چەند خاڵێكی هاوبەش و لێكچوو دەكەین بە تایبەت لە ڕووی رەفتاری كارەكتەر و روودانی ڕووداوەكان و پاشان دەربڕینی دیالۆگەكاندا. 
(ئەمە تەنها سەرنجێكی تایبەتی خۆمە، وە بەهیچ شێوەیەك مەرج نیە وا بێت! بەڵام تەنها؛ خوێندنەوە و بەراوردكارییەك و شوبهاندنێكی خۆمە لەنێوان ئەو دوانەدا.)
بێگومان وەك دەزانین؛ وەك زەمەن و كاتی لە دایكبوون و ژیانكردنی دۆستۆیڤیسكی و پاشان نوسین و پەرتووكەكانی بە نزیكەیی بەمەودای (سەد ساڵ) مەزەندە دەكرێت بەراورد بە زەمەنی ئێستا، واتا؛ تەنانەت دۆستۆیڤیسكی مەزن، بەنزیكەیی سەدەیەك بەر لە دایكبوونی تارانتینۆی دەرهێنەر ژیاوە، هەربۆیە شتێكی زۆر مەنتیقی و ئاساییە گەر تارانتینۆ كاریگەر بووبێت بە نووسین و كارەكتەر و رووداوەكانی هەندێك لە رۆمانەكانی دۆستۆیڤیسكی و بە تایبەت سوودی لە سێ لایەنی سەرەكی ئەو نوسەرە مەزنە وەرگرتبێت؛ 
(یەكەمیان؛ ڕووداوەكــان)
كاتێك رووداوێك، بەسەرهاتێك، لە نێو پەرەگرافەكان و دێرەكانی رۆمانەكانی دۆستۆیڤیسكیدا دەخوێنێتەوە، دواتر وەك شێوازێكی تەكنیكی نووسینی تایبەت بە لایەنی جیهانی فیودۆر لە لات رووندەبێتەوە كە چۆن و بە چ شێوازێك ئەو رووداوانە روویانداوە! واتا؛ بە گەڕانەوە و فلاشباكێكی خێرا بۆ ڕابردووی ڕوودانی ڕووداوەكان. پاشانیش، بەڕوودانی بروسكەئاسای حاڵەتی كوشتن و بڕین و خوێنرشتنی قێزەوەن و هەندێكجار گاڵتەجارانە. بە تایبەت لە هەر چوار فیلمی (Reservoir Dogs) و (The Hateful Eight) و (Inglourious Basterds) و (Pulp Fiction)دا.
(دووەمیان؛ كارەكتەرەكـان)
هەمیشە، پێكهاتە و بونیادی كارەكتەرەكان، وەك خوێنەرێك لە ڕۆمانەكانی فیودۆردا، جگە لە تایبەتەمەندی وەك لایەنی ئاڵۆزی لە كارەكتەردا، بەڵام ئێمەی خوێنەر دواتر یەك بە یەك دوای یەكتر ئاشنا دەبین و بە كۆی كارەكتەرەكان كە هەموویان لە جێگەیەك كۆدەبنەوە، یاخود لە شوێنێك و لۆكەیشنێك یەكدەگرنەوە. هەر بۆ نمونە؛ ئەم حاڵەتانە لە خوێندنەوەی هەردوو رۆمانی بەناوبانگی (برایانی كارامازۆف) و (شەیتانەكان) و تەنانەت (تاوان سزا)دا، بەدی دەكرێن. وەكچۆن هەمان شت و هەمانلایەن لە لە لایەكی دی لە هەرسێ فیلمەكانی (Reservoir Dogs)و (The Hateful Eight)و (Inglourious Basterds)دا، بەدیدەكەین. 
(سێهەمیان؛ شـێواز و بونیادی دیالۆگەكـان)
بەردەوام لە رۆمانەكانی دۆستۆیڤیسكیدا شێوازێك، یاخود تایبەتمەندییەك لە دیالۆگە توڵانی و درێژ و لایەن دەروونشیكارییەكانیدا بەدی دەكرێن، پاشان بە روودانی لە ڕووداوی لە ناكاو و نەخوازرا و پڕ سترێس، هەمان دۆخ و حاڵەت لە فیلمەكانی تاراینتنۆدا بوونیان هەیە؛ وەك دیالۆگی بازاری و فەلسەفی و دوورودرێژ و سایكۆیی و تەنانەت قسەی پووچ و بێ مانا و جنێویش، بە تایبەت لە هەر چوار فیلمەكانی (Reservoir Dogs) و (The Hateful Eight) و (Inglourious Basterds) و (Pulp Fiction)دا.