بەخێربێن بۆ مەقادیشۆ!

4 مانگ پێش ئێستا

قـادر ئەحمەـد جاسم
ماوەیەك پێش ئێستا شانازی ئیبراهیم ئەحمەد لە نوسینێكدا ڕەخنەی گرتبوو كە میلیشا ڕەنگاوڕەنگەكانی بەرپرسان سلێمانیان كردووە بە تەكساس . ڕەخنەكانی جوان بوون بەڵام لەو خاڵەدا هەڵەبوو كە دەڵێ سلێمانی بووە بە تەكساس. شەڵڵا تەكساس بووایە، ئیتر خەڵكی ئەم شارە چی دەویست! ڕاستیەكەی شار نەبووە بە تەكساس بەڵكو وەك بافڵ تاڵەبانی وتی (هاوڕێكانم لە دەرەوەی وڵات دەڵێن ئەوە چیە، مەقادیشۆیە؟!). بەڕاستی هاوڕێكانی بافڵ تاڵەبانی باشتریان پێكاوەو شار مەقادیشۆیە. مەقادیشۆی پایتەختی سۆماڵ، كە ئێستا سوپای توركیا كەمێك ڕێكیخستووەتەوە، پێشتر نمونەی پایتەختێكی بێسەروبەر و پڕ پشێوی و بێ یاسا و ڕێسابوو.

لەهەر وڵاتێك یاسا سەروەر نەبوو ژیان دەبێت بە غابات و شار دەبێت بە مەقادیشۆ. با لە بەرپرسانی شار و لە دەسەڵاتی دادوەری شار (داواكاری گشتی و دادوەرە بەڕێزەكان) بپرسین، دەرەنجام و بڕیاری دادگا لە دەیان كەیسی تاوان بە چی گەیشتووەو با بۆ خەڵكی شار و هاوڵاتیانی هەرێمی ڕوونبكەنەوە، با پێمان بڵێن:
-ئەو هێزەی لە بازگەی تاسلوجە ئاسایشێكیان كوشت، فەرمانی دادگا چی بوو و كەیسەكە بەچی گەیشت!؟
-ئەو هێزەی لە سەرچنار چەند ئاسایشێكیان برینداركرد، فەرمانی دادگا چی بوو و كەیسەكە بەچی گەیشت؟!
-ئەو كەسەی كە بەرپرسی پاسەوانەكانی بەرپرسێك بوو و بە كلكە دەمانچە لە وەستای نانەواخانەیەكی‌ دا دوای ئەوەی برای وەستاكەی لە باڕەكانی سەرچنار كوشتبوو، فەرمانی دادگا چی بوو و كەیسەكە بەچی گەیشت؟!
-كوڕی عەمیدە سەربازیە خانەنشینەكە و كوڕەكەی بەرپرسێكی دیكە بە ‌چەك ڕووبەڕووی یەكتربوونەوە، فەرمانی دادگا چی بوو و كەیسەكە بەچی گەیشت!؟
-كوڕی بەرپرسێك پاسەوانی شوێنی نیشتەجێبوونی كوشت، فەرمانی دادگا چی بوو و كەیسەكە بەچی گەیشت؟
-هێزی تایبەت دەچێتە سەر فەرماندەی سەربازی و خۆی و پاسەوانەكانی دەكوژێت، فەرمانی دادگا چی بوو و كەیسەكە بەچی گەیشت !؟
-لەسەر كۆنتڕۆڵی هێزە سەربازیەكان كەوتنە گیانی یەكتر و كوژراو و برینداری لێكەوتەوە، فەرمانی دادگا چی بوو و كەیسەكە بەچی گەیشت؟
-چەكداری حیزب خۆی دەكات بە قوتابخانەدا و سەفتە پارەكە وەردەگرێت و پەلاماری باوك و كوڕ دەدات، فەرمانی دادگا چی بوو و كەیسەكە بەچی گەیشت؟!
-هەمان تۆمەتبار پێشتریش پەلاماری ئەفسەری هاتوچۆی داوە لە كاتی دەوامی فەرمیدا و هەوڵیداوە بیكات بە ژێر ئۆتۆمبێلەكەیەوە، فەرمانی دادگا چی بوو و كەیسەكە بەچی گەیشت؟!
-لە هەمووی دڕندانەتر، چەكداری حیزب بە شەق لە كەللـە سەری خوێندكاری زانكۆ دەدات، قوباد تاڵەبانی دەڵێ دەبێت تۆمەتبار دەسگیربكرێت، بەڵام ڕێز لە قسەكەی خۆی ناگرێت!، فەرمانی دادگا چی بوو و كەیسەكە بەچی گەیشت؟!

ئەمەی سەرەوە نمونەیەكە لە خەرمانێك، دەكرێ دەیان كەیسی تر لێرەدا ڕیز بكەین. دادوەر و پارێزەرەكان دەڵێ ڕۆژانە كەیسی سەیروسەمەرە دێتە دادگا، باندی چەتەیی لە چیاكانی گۆیژە و ئەزمەڕ (بەتایبەت هاوینان) هەموو شەوێك خەڵك ڕووتدەكەنەوە، كوڕە بەرس و باندی تاوانكاری لە پاركی ئازادی و لەسەر ڕێگای دوكان سلێمانی خەڵك رووتدەكەنەوە و چەقۆكێشی و شەقاوەیی دەكەن، دەسەڵاتی ئەمنی و دەسەڵاتی دادوەری ،ئەنجامی هەموو ئەم كەیسانە چی بووە و بە چی گەیشتووە؟ تكایە وەڵام!