میدیای بەرپرسان و حیزبەكان، چۆن ڕێگرن لەچاندنی تۆوی هۆشیاری؟

4 مانگ پێش ئێستا

لەیلا محەمەد
سەردەمێك بوو دوو كەناڵی تەلەفزیۆنی و لەتێك لەباشوری كوردستان هەبوون بەڵام بەشێك لەبەرنامە و بابەتەكانی پەخشئەكران ڕوناكیەكیان ئەگەیاند بە بیری ئێمە و پرسیاری جدیان لا دروست ئەكردین. هەندێ لەو كەسانەی لەو دەزگایەنەوە گفتوگۆی بابەتێكیان ئەكرد یان زانیاریەكیان ئەگەیاند، بەراستی كاریگەری ئەرێنی دروست ئەكرد لەسەرمان.
بۆچی؟ 
ئەتوانم بڵێم چونكە ئەو میدیا و دەزگایانە وەك لایەنێكی رۆشنبیری ئیشیان ئەكرد و بەهەموو كەموكورتیەكیانەوە هێشتا كوالێتی و سەنگێكیان هەبوو چونكە هێشتا وای لێنەهاتبو هەر بەرپرسەو دەزگایەكی هەبێ و هەموو ئەركەكەشی كوتینەوەی نەیارەكەی بێت لەو دەزگایەوە یان جێبەجێكردنی ئەجێنداكانی خۆی بەڵكو كۆششێكی زۆر ئەدرا كە ئەم دەزگایانە رۆڵیان هەبێ لە هوشیاركردنەوە و رۆشنبیر كردنی خەلك. لەهەمان كاتدا بەرنامەی زۆر لەسەر هەر بابەتێك ئەكرا كاریگەری جێئەهێشت.

بەڵام ڕەوڕەوەی مێژوو لە دوو دەیەیی ڕابردوا ئێمەی لە لە شتە ڕوكەشیەكانا بردە ئاسمان و لە بابەتە جەوهەریەكانا بە قوڕیا بردین.

لەدوای ئەوەی گۆڕان هەموو ئەحزاب و گروپێكی فێركرد كە بەڵێ میدیا دەتوانێت كاریگەری هەبێت تا ئەو ڕادەیەیی چۆنت بوێ وا كۆمەڵگەی پێ هەڵسوڕێنی ئیتر بەرپرسەكانی كورد كەسی نەماوە دەزگایەكی ڕاگەیاندن دانەنێت و لەوێوە ففو بكات بە كەڕەنای خۆیدا
ئەم بەرپرسانە دارایی ‌و پشگیری مەعنەویان بۆ ئەم میدیایانە دەستەبەر كردوە لەبەرامبەر ئەوەیا لەشكرێك لە میدیا كار بۆ زەمانی پشگیری لەسیاسەتی ئەوان ئەكەن بەبێ فلتەر بەبێ هوشیاری و تەنكترین توێكڵی ئاگایی بە‌رامبەر ئەو وێرانكاریەیی ئەوان لەسەر دڵ و مێشك و یادەوەری مرۆڤی كورد جێی ئەهێڵن. 

ئاستی كارەساتەكە ئەوەندە قوڵە لەوەیا نیە كە مرۆڤ تەنها شەرم بكات یان دڵی پڕ بێت لە گریان لەبەر ئەو كاولكاریەیی ڕوو ئەیات بەڵكو هەستێكی وات بۆ دروست ئەبێ كە بەڵێ ئەوەی هەموو ڕۆژێ لەم دەزگایانەوە ئەیبیستی و ئەیبینی هاڕەی وردبونی مێشكی نەوەیەك و دوان و سیانە بۆ سەدەیەكی تر .

ئەوە بە راستی كارەساتە دەزگایەك ملیۆنان دۆلار خەرجی مانگانەی بێت و بە كوالێتی بەرزتر لە میدیایی جیهان پەخش بكات بەڵام لەڕوی پەیامی راگەیاندنەوە هێشتا لە قۆناغی ڕەگەزپەرستی و قۆناغی دژوەستنەوە لەگەڵ ماف و ئازادی و دەیان پێشێلكاری ئاشكرایا بێت بەرامبەر كۆمەڵێك بەها و بنەمای گرنگ. هێشتا زمانێكی بەرز و جیاوازی نەك نەبێت بەڵكو خەیاڵێكیشی لەبارا نەبێت بەرامبەر بەوەی زمانی میدیا هەڵگری تۆوی ئەو بەهایانەیە كە لە یاسایەكی دادپەروەرە دێن، لەناو گوتاری ڕۆشنبیری و هوشیاریەوە دێن، لەهەموشی گرنگتر لەناو پەروەدە و زانستەوە دێن. 
پرسیاری ئێمە هەر ئەوە نیە كە ئایا راگەیاندن لەو وڵاتە بەڕاستی ئەیەوێ بەكوێمان بگەیەنێ؟ بەڵكو ئەبێ ئەو پرسیارەش بكەین گەلێك بەڕاستی ئەیەوێ بەرەو كوێ بڕوات؟