كە دەچیتە بەغا!

1 مانگ پێش ئێستا

ئاسۆ عەبدوللەتیف      
* ئەوەت لە بیربێ ئەها ئەم رۆژانە چەند زەلیلی لە بەردەم دەنگدەرانی هەژار و نەدار  تا بە پەیژەكەیاندا سەركەویتە سەری سەرەوەی هەڕەمەكە.

* ئەها، چۆن وەك دارتوو دەیانتەكێنیت و بەرچنەی لێ پڕدەكەیت بۆ مووچە و ئیمتیازەكەت، دەی ئاواش بیری كەرامەت و شكۆی خۆت و نەتەوە و دەنگدەرەكانت بكەرەوە لەو بەغای عروبە و حەشد و مەزهەبگەرایە.

* ئەها چۆن قەڕەوڵی تفەنگت میزانە و راوی دەنگەكانیان دەكەیت و تۆڕ دەخەیتە گەردن و ملیان بە دروشمی گەورە و كۆن و ستۆك و وەدینەهاتوو، دەی ئاواش خزمەتی دەنگدەرەكانت بیر نەچێ و ژمارە تەلەفۆنەكەت مەگۆڕە و دروشم و لێدوان و جنێودان بەسیەتی و ئازار و برین و برسێتی و بێمووچەیی چارە ناكات.

* ئێستا خۆت بینیوە وەك سمۆرە ئەم دوكان و ئەو دوكان، ئەم كەناڵ و ئەو كەناڵ، ئەم چڵ بۆ ئەو چڵ دەكەیت بۆ كۆكردنەوەی دەنگ و یەكەمجارتە جلی كوردی بپۆشی، یەكەمجارتە ماڵە هەژار ببینیت، یەكەمجارتە وێنەیان لەگەڵ بگری، یەكەمجارتە ئاڵای كوردستان هەڵكەیت، دەی بۆ یەكەم جاریش راستگۆ و بەكەرامەت بە و دژی قەوارە و هەرێمی دەنگدەرەكانت مەوەستەوە و هەوڵی بەدەستورییكردنی بدە!

* ئەها خەڵك چەند سادە و خاكەڕاو خانەخوێ و جوامێرن، كاتێ دەنگت پێ دەدا شەرم دەیگرێ، دە تۆش تۆزێ جوامێربە و وەفای ئەو شەرمەت بیرنەچێ و ویژدانی خۆت و كلیلی ئەم كەرامەتەی خۆت تەسلیمی هیچ كوتلەیەكی فاشیستی دژە كورد مەكە.

* كە دەچیتە بەغا شەهامەتی پیاوەتی و ژنێتی خۆت مەگۆرەوە بە هیچ خۆفرۆشییەكی ژێربەژێر و سەفقەیەك بۆ پارە و ئیمتیاز، بیری گرێبەستی لابەلاو كۆكردنەوەی پارە و كڕینی شوقە و كەین و بەین مەكەرەوە، لەسەر سنگ و دەنگت بنووسە بۆ فرۆشتن نییە، بەس كڕیاری یاسا و بڕیاری چارەنووسسازبە بۆ میللەتەكەت.

* چانست هەیە ئەمجارە دەنگدەر هیچ دەرفەتێكی دیكەی لەبەردەمدا نییە تۆ نەبیت، بۆیە تۆ كەسێكی ناچارییت بۆدەنگدەر، بۆیە ناچار مەبە لەودیو حەمرینەكەتەوە سەرت بۆ هیچ غەددار و نامەردێك بچەمێنی و شۆڕكەیتەوە.

* تۆ دەزانیت هەڵبژاردنی عێراق شانۆگەرییەكی كۆمیدییە بۆ سیستمێك، كە بۆنی فاشیزم و پاكتاوكردن و هۆڤییەتی لێ دێ،  تۆی كورد لەناو ئەو هەموو رێویەدا شێری موزایەدەچی و دروستكراو مەبە هیچت پێ ناكرێ، خۆت بە شێر لەقەڵەم مەدە، هەر ئەوەندە رێوییەكی سرك و بەهەڵوێست بە.

*  دیاری وەرمەگرە لە هیچ كوتلەیەكی پەرلەمانیی دژی نەتەوەكەت تۆ سواڵكەر نیت، بچووكی هیچ عەیب و نەنگی نییە، خۆفرۆش هەمیشە بچووكە بەو بچووكییەی خۆت،  بەو گرام و میلیم و سانتیمەترەی خۆتەوە، كیلۆكان هاوسەنگ و تەوازون بكە بەلای نەتەوەكەتدا، مەهێڵە هیچ كەس غەش لە هاونیشتیمانیانت بكات، ئەگەر گرامی بچووك نەبێت، كیلۆ قیمەتی نییە، ئەگەر سانتیم نەبێت بزانە مەتر ئەهمیەتی نییە.

* كۆبونەوەی نهێنی لەگەڵ هیچ كەس مەكە، تۆ نوێنەری میللەتێكی بێ دەوڵەتیت، بیر لە ویژدانی خۆت بكەرەوە كە چۆن دەنگت كۆدەكردەوە بە عەمود و دار و شاخ و سەربانا سەردەكەوتی، بیر لە نەخۆشەكانی شێرپەنجەی هیوا و نانی كەلی بكەرەوە، بیر لە پێشمەرگەی برسی و كەم ئەندام بكەرەوە، بیر بكەرەوە دەوڵەمەندی ئامانج نییە كوشتنی بڕوا و ئامانجەكەتە.