كوشتاری پیرۆز: داعش ..دە ساڵ دەرچوون لەسەر فرمانی خودا

1 مانگ پێش ئێستا

شەماڵ بارەوانی
كتێبێكی دانسقە (١٧٠)لاپەڕەیی نووسەرو ڕۆژنامەنووس و شاعیری میسری (محەمەد حەمیدە)یەو تێیدا باس لەئافاتەكانی فكری توندڕۆیی و عەقڵیەتی فەندەمێنتالیستی دەكات، نوسەر لەو كتیبەدا، كەبەسەر ٢٠بەشدا دابەشیكردووەو
باس لەگرووپە چەكدارە ئوسوڵی و میلیشیاو ڕادیكاڵە ئیسلامگەراكان دەكات، لەپاگراوەندنی فیكری و فیقهی و ئایینیان، لەو پرنسیپ و بنەمایانەی كە عەقیدەو دۆگم و دۆكترینی ئەو تاقمە بناژۆخوازو توندڕۆیانەی لەسەری ڕۆنراوەو دامەزراون دەدوێت.
لەكێشەو ئەزمەی فیقه و فیكری ئیسلامی دەدوێت، باس لە سەرچاوەی دۆگم و تێگەیشتنەكانی داعش دەكات، لە تیوری تیرۆرو ژێدەرە توندڕۆییە فقهی و فیكریەكانی داعش دەدوێت،لەسەرچاوە داراییەكانی ئەو گرووپە تیرۆرستەو قەبارەی ئابووریەكەی،لەو كەلەپورو سەرچاوە فیقهی و فیكریە ئیسلامیانە دەدوێت كە هۆكارو فاكتەری سەرەكی سەددەرسەدی درووست بوونی بیری ڕادیكاڵی و سەرهڵدانی عەقڵیەتی توندئاژۆیین،لەو كەسایەتی و پیاوە ئایینی و مونەزیرانەی ڕۆڵی بەرچاویان هەبووەو هەیە، لەسەرهڵدانی هزری فۆندەمێنتالیستی و دەركەوتن و دروست بوونی گرووپە پەرگیرو توندڕۆكان، دەدوێت، لە نمونەی ئیبنولتەیمیەو ..تاد.

نووسەر بەوردی قسە لەدرووست بوون و قۆناغەكانی گەشەسەندنی ئەو ڕێكخراوە تیرۆرستیە(داعش) دەكات ،لە ئاریشەو ململانێ ناوخۆیەكانی ئەو گرووپە دەمارگیرو پەڕگیرە، پەیوەندی لەگەڵ حوكومەت و وڵاتانیترو ڕێكخراوە تیرۆرستەكانی تر، سەركردەكانی،ئالیەت و پێڕەو پرۆگرام و میتۆدی كاركردن ، تاوان و كارو كردەوە قێزەون و تیرۆرستیەكانی،مەنهەجی خوێندن و شێوازی بەداعشكردنی خەڵك،پێشەلیەكان و لادانەكانی داعش لەدژی پڕنسیپەكانی مافی مرۆڤ و یاسا نێودەوڵەتیەكان، ڕفاندن، لاقەكردن، كوشتن و سەربڕین و شێواندن و ئەتكردن، بەكۆیلەكردن و بەسەبایاكرنی مرۆڤ و كڕین و فرۆشتن و بازرگانی كردن بەژن و مناڵ، بەكارهێنانی زارۆك و نەوجەوان و هەرزەكار بۆ جەنگ و كاری توندوتیژی و سەربازی و تیرۆرستی و ژێرپێ خستنی مافەكانی منداڵ بوون و بەهای مرۆڤ بوون،..تاد. دەدوێت. لەسەر پەیوەندی ڕاستەقینەی ئەو گرووپە توندئاژۆیه قسەدەكات، لەگەڵ توركیاو حیزبی دادو گەشەپێدانی ئیخوانی فەرمانڕەوای ئەو وڵاتەو، و وڵاتی قەتەرو ویلایەتە یەكگرتووەكانی ئەمریكاو وڵاتانی ئۆروپا،قسە لەسەر پەیوەندی و ڕۆڵی كونسوڵخانەی توركیادەكات لەگواستنەوەی گەنجە میسریەكان بۆ نێو ڕیزی ئەو تاقمه بەربەریە، ئەو تاقمەی كوشتن و ئەتكردنی مرۆڤ، بیروباوەڕو ستراتیژی و ئایدیۆلۆژیایەتی، ئەو گرووپه دەروون نەخۆش و مێشك شێواو عەقڵ ژاراوی بوو و سادیكەی چێژ لەكوشتن و سەربڕینی مرۆڤ و وێرانكردنی ژیان دەبەن، گرووپێكی خوێن ڕێژو مرۆڤ كوژ،گرووپێكی بێ بەهاو داچۆڕاو لەهەموو مۆڕاڵ و قییەم و ئەخلاقێك، ئەو بەربەریانەی ناو لەخۆیان دەنێن جوندوڵڵاو خۆیان دەكەن بە نوێنەرو سێبەرو شمشێری ئاسمان و بەناوی ئایین و لەپێناو خواوەندەوە،ڕاست و چەپ دەدەنە بەر، دەكوژن، سەردەبڕن، ئەتكدەكەن، وێران دەكەن، دەسوتێنن، داگیردەكەن،مرۆڤ دەكەن بە كۆیلەو كەنیزە، ژن ،كچ، دایك وخوشكی خەڵك دەستبەردادەگرن و دەستدرێژی بێ حورمەتی و بێ ئەخلاقی و نامرۆڤانەیان دەكەنە سەرو مرۆڤ بوون و كەرامەت و ئازادی و سەربەستی و بوونیان ئەتك و لاقەدەكەن، ئەو تیرۆرستانەی ئایین دەكەن بەشمشێرو گەرووی خەڵكی پێدەبڕن، ئایین دەكەن بە دێوەزمەیەكی ترسناك و مرۆڤەكانی پێ دەتۆقێنن و دەترسێنن، ئایین دەكەن بەئایدۆیۆلۆژیایەكی فاشیستانەو جیاوازیەكانی پێ دەسڕنەوەو و ژیانی پێ خاپوور دەكەن، ئایین دەكەن بە ئامڕازێك بۆ گەیشتن بە دەسەڵات، ئامڕازێك بۆ بەدەستهێنان و كۆكردنەوەی سامان و پارە، بۆ مسۆگەركردنی چوارژن و دنیایەك كەنیزەو حەفتاو دوو حۆری، لەپێناو ناوگەڵ و ئارەزووی بۆگەنیان، ئەو هۆڤانەی لەجیاتی ئەوەی ئایین بكەن بەهۆكاری جوانكردن و بەرەو پێشەوەبردن و گەشەكردنی ژیان و فاكتەری تۆلەرەنس و لێخۆشبوون و یەكترقبوڵكردن و قوڵكردنەوەی گیانی برایەتی و ڕوحی تەبایی نێوان مرۆڤەكان، بە پێچەوانەوە، دەیكەن بە فاكتەری تێكدانی ژیان و سڕینەوەی جیاوازیەكان و خنكاندنی هەناسەی فرەیی (پلورالیەت) و ناشیرین كردنی جوانیەكان و پێشێلكردنی مافەكان و ژێرێ خستنی بەهاكان و لێدان لەكەرامەت و بوونی ئینسان!

كوشتاری پیرۆز: داعش ..دە ساڵ دەرچوون لەسەر فرمانی خودا
پێمان دەڵێت داعش. بەتەنها دروستكراوی دەستی ئەمریكاو گەمەی وڵاتانی ئیقلیمی و ئۆوروپا نییە! وەك ئەوەی زۆرجار لای كەسانێك كەدەیانەوێ خۆیان لەڕاستیەكان بدۆزنەوەو خۆڵ بكەنە چاوی خەڵكەوەو حەقیقەتەكان بەرەواژو ڕاستیەكان پێچەوانە بكەنەوە، وا دەگوترێت و بەرگوێمان دەكەوێت، گوایە داعش درووستكراوی ئەوانە، نەخێر ڕاستیەكە شتێكیترەو بەڵكە لەپشت ئەو تەلیسم و گرێكوێرەیە، حەقیقەتیترو شتی تر هەیە،دەبێ پەردەیان لەسەرلابدرێت و ڕاستیەكان،بێ چەواشەكاری و دەستكاری و ناشیرینیەكانیش بێ ماكیاج و مۆنتاجكاری وەك خۆی بێ كەم و زیاد، بۆ هەموان ڕونبكرێتەوەو بخرێتە ڕوو، كە داعش پێش ئەوەی ئارپێچی و هەمەڕی سەربازی ئەمریكی و چەكی میلانۆی ئەڵمانی و كڵاشینكۆفی ڕوسی و دووربینی پێشكەوتوانەی ژاپۆنی و كۆمەڵێك دەبابەی فەرەنسی و دۆشكەی سویسری و دوو شاحینە ڕۆنی توركی و سێ بارهەڵگر خورمای سعودی و پشتگیریكردن وختوكەدانی قەتەری و دەست لەپشت دانی ئەم و ئەوبێت، داعش،بەدیوەكەی تری بەردەوامی پێدان و درێژكراوەی مێژووەكی دورو درێژە،داعش، تێكستە،توراسه،فیقهو تێگەیشتنە، دۆگم و ئایدیۆلۆجیایە، عەقیدەو بیرو باوەڕه، مینتاڵینت و ئەقڵیەتە، كتێب و قەناعەتە،

بۆیە داعش هەرگیز لە سەر هەسارەیەكیترو مەریخ نەهاتووە، یاخود لەپڕ لەژێر زەوی قارچك ئاسا هەڵنەتۆقاوە،بەڵكە ئەو، لەسردابی توراسێكی ناشیرین و لەنێو تونێڵی تاریخێكی ڕەش و خوێناویەوە، دووبارە سەری هەڵێناوەتەوەو سەری هەڵداوە، ڕاستە وڵاتانی زڵهێزو جیهانی و هەرێمی، داعش لەپێناو بەرژوەندی خۆیان بەكاردێنن و زۆر جار پشتگیری لۆجستی و دارایی و هاوكاری سەربازی و ستراتیژی داعش دەكەن.لەپێناو ئەوەی بەمەرامی ئابوری-سیاسی-شۆڤێنیانەی خۆیان بگەن و وەك ئامڕازێك و لەشێوەی بوكەڵەیەك داعش بۆخۆ قازانجی خۆیان بەكار دێنن، وەلێ حەقیقەتێكی گومان هەڵنەگرو رەنگە لای زۆرێك نەزانراوبێ، هەیەو دەبێ هەموان بیزانین و دانی پیابنێین، ئەویش ئەمەیه، داعش بەرلەوەی ئەمریكاو ئۆروپاو توركیاو قەتەرو سعودیەو فلان و فیسار دەوڵەت پشتگیری و هاوكاری بكەن، داعش وەكو فیكر، وەكو عەقڵیەت، وەكو دۆكترین و دۆگم و ئیدەلۆژیا،وەكو بیروباوەڕو موقەبیلات،لەناو كتێبەكان، لەناو كەلەپورو لەناو مێژوودا هەیە، داعش لەناو ئەو دێڕانەدا تەوەلود دەكات و بەرهەم دێت، كە باس لەبەكەنیزەكردن و بەكۆیلەكردنی مرۆڤ دەكات، بیری ڕادیكاڵی و توندئاژۆیی لەهەناوی ئەو كتێبە فقهیانە لەدایك دەبێت، كە بەناوی فتوحاتەوە،باس لە داگیركردن و دەستبەسەرداگرتنی خاكی وڵاتان دەكات، تیرۆر لەناو بۆتەی ئەو كەلەپورە ژەنگگرتووە كۆنەخوازو ئێكسپایەربووە بەپیرۆزكراو به بڤەكراو دەستكاری نەكراو بەهێڵ كراو بان ڕەخنەكراوە، سەرهەڵدەدات كەڕەوایەتی بە سەربڕین و كۆشتنی مرۆڤ دەدات، لەسەر جیاوازی ئایین و مەزهەب ، لەسەر بیروڕای جوداو گۆڕینی ئایین و ئازادی ڕادەربڕین، لەسەر ڕەخنەگرتن و بیركردنەوەی ئازادانە، داعشی خەوتوو لەناو منداڵدانی ئەو توراسەی سەربە سەدەكانی ناوەڕاست دێتە بوون و لەخەوی خورافەو خەوی خەیاڵاوی دژه ئەقڵ و دژ مرۆڤ و دژه ژیان، دژە زانست و دژە مرۆڤ و دژە پێكەوەژیان،بەئاگادێتەوەو بێدار دەبێتەوەو دەبێت بە دژو دوژمنێكی سەرسەختی هەموو پێشكەوتن و كرانەوەو جوانییەكان، كاتێك لەسەدەی بیست و یەك و لەسەردەمی شۆڕشی زانستی و جەنگی تەكنەلۆژی و دروستكردنی ڕۆبۆت و چونە سەرمانگ و جیهانگیری و مۆدێرنێتەدا،لەو سەردەمی فەلسەفەی جێندەری و بیری یەكسانیخوازی و ئازادی خوازی و مافی مرۆڤ و ژینگەدۆستی و ئاژەڵ دۆستی و هەموو شتێك دۆستیدا، تازە بەتازە باس لەبێ عەقڵی مێینە و كەم عەقڵی و نیوە عەقڵی ژن و بەكێل نەهاتنی ژن بۆ سەركردایەتی و بەكەم سەیركردنی ژن بكرێت!

كوشتاری پیرۆز: داعش .. دە ساڵ دەرچوون لەسەر فرمانی خودا».
پێمان دەڵێت كوشتن كارێكی قێزەون ترسناكە، وەلێ ئەو كاتە زۆر ترسناكترو قێزەونتر دەبێت، كاتێك بەرگی پیرۆزی ئایینی لەبەردەكرێت و ناوی خواوەندی لێ دەنرێت! كوشتن، كوشتن، كوشتن، ئەرێ تاكەی كوشتن و خوێن ڕشتن!؟خۆلەوەتەی مرۆڤ و مرۆڤایەتی هەیە، لەوەتەی مێژوو و دەرەوەی مێژوو و پێش مێژوو و چونە ناو مێژوو گەیشتن بە لوتكەی پێشكەوتن و هەڕەمی شارستانیەت هەیە، لەوەتەی میتۆلۆژیای هابیل و قابیل هەیە، لەوەتەی مرۆڤایەتی پێی خستوەتە سەر زەوی، كوشتن هەیەو مرۆڤ مرۆڤ دەكوژێت، مرۆڤ ئاژەڵ دەكوژێت، مرۆڤ پەلەوەر دەكوژێت، مرۆڤ زیندەوەر دەكوژێت، هەر بەراستی جوانترین پێناسە، كەپڕ بەپێستی مرۆڤ بێت، بكوژە، مرۆڤی بكوژ، بیری كوشتن تێكەڵ بەخوێن، بەشادەمار، بەڕۆح و گیان، بەهەناسەو هزری بووەو،ئەو بیرەنەگریسەی كوشتنی گواستۆتەوە بۆ نێو مەزهەب، بۆ نێو ئایین، بۆنێو ئایدیۆلۆژیاكان و فەلسەفەكان،بۆنێو خێلەكان و خانەوادەكان، مرۆڤ لەپێناو ئایینەكەی، لەپێناو مەزهەبەكەی، لەپێناو ئایدیۆلۆژیاكەی، لەپێناو خێڵ و خانەوادەكەی، لەپێناو عێل و عەشرەتەكەی، لەپێناو خۆی و خوێنەكەی،مرۆڤ دەكوژێت، ئەرێ دە بەسیەتی تكایە، تاكەی كوشتن، كوشتن، كوشتن،ئەرێ لەڕشتنی خوێنی مرۆڤ، لەئەتكردنی كەرامەتی مرۆڤ، لە سەربڕین و لێدان و سوتاندن و تێرۆركردنی مرۆڤ،تێرنەبوون بێزارنەبوون، تێرنەبوون لەم هەموو تیرۆركردنە، بێزانەبوون لەم هەموو كوشتنە؟ لەم هەموو ئەتكردنە، لەم هەموو وێرانكردنە!؟ ئەرێ دەبێ كەی واز لەبیری مرۆڤ كوشتن و فەلسەفەی مرۆڤ ئەتكردن و عەقڵیەتی دواكەوتوانەی مرۆڤ وێرانكردن بێنن؟ كەی دەبێ فەرهەنگی مرۆڤایەتی واز لە ئیدیومی كوشتن و عەقڵیەتی خوێن ڕشتن بێنێ؟! ئەرێ ئایین، مەزهەب، خێل و خانەوادە، عەشیرەت و ئایدیۆلوژیا لەمرۆڤ پیرۆزترن. تا لەپێناویاندا مرۆڤ بكوژرێت و خوێنی مرۆڤی لەپێناویاندا بڕژێندرێت!