وەسێتەكەی مام جەلال جێبەجێ نەكرا

2 ساڵ پێش ئێستا

نوسینی: تابلۆ محەمەد
من هەمیشە ویستومە خۆم لەبڕیاری ناوخۆی حزبە سیاسییەكان بەدوربگرم، چونكە ئەوە پەیوەندی بەمنەوە نییە و بڕیاری خۆیانە، بەڵام كاتێك دێتە سەر حزبێكی سیاسی سۆسیال دیموكرات و دامەزرێنەی ئەو حزبەش (مام جەلال)ە، نەك من دەبێت هەموان بەوردی لە بڕیارەكانی بڕوانین، بەتایبەتی ئەو بڕیارانەی لەبارەی ئازادی رادەربڕینەوە، چونكە مام هەمیشە پشتیوانی ئازادی رادەربڕین بووە و رێگەی نەداوە لەم بارەوە كەس گفتوگۆی لەگەڵ بكات و وتویەتی ئەو چی نوسیوە ئێوە وەڵامی بدەنەوە، بەڵام بەداخەوە دوای تەنها (3) ساڵ و (1) مانگ و (18) رۆژ بەسەر كۆچی دوایی مام وەسێتەكەی جێبەجێنەكرا.

رەنگە زۆر كەس بپرسێت وەسێتی چی؟ هەمومان باش دەزانین هەركەسێك بەر لە كۆچی دوایی وەسێت بكات یاخود نەكات، بەشێك لەكار و پشتگیرییەكانی دەبن بە وەسێت، بەتایبەت ئەگەر ئەو كەسە باڵا دەست بێت و فەرمانڕەوا بێت، بۆیە مام جەلالیش تا لە ژیاندا بوو هەمیشە پشتگیری ئازادی رادەربڕین و نوسین و چاپكردنی كتێب بووە، بۆیە دەتوانین بڵێین بەدەر لەو وەسیەتەكەی كە كردویەتی، ئەوا ئازادی چاپ و چاپەمنیش یەكێكە لە وەسێتەكانی.

ئەگەر بە خێرایی بگەڕێینەوە بۆ شاخ و رێك بۆ ساڵی 1982 كە دەكاتە (38) ساڵ بەر لە ئەمڕۆ مام جەلال پشتگیری لە ئازادی رادەربڕین كردووە، ئەویش كاتێك محەمەد موكری رۆمانی (سەگوەڕ) لە دووتوێی (102) لاپەڕە دەنوسێت و لە ناوچەكانی ژیر دەسەڵاتی یەكێنی بڵاویدەكاتەوە، هەر زوو چەند كەسێك دژی ئەو رۆمانە دەوەستنەوە، بەڵام مام جەلال ئامۆژگاریان دەكات نوسین بەنوسین وەڵام دەدرێتەوە نەك بەهەڕەشە و بڕیار، بۆیە پێویستە ئەوانەی لەگەڵ بۆچوونەكانی نین وەڵامی بدەنەوە، دوای ئەم قسەیەی مام رۆمانەكە كاریگەریی زۆرتری دەبێت و خوێنەری زۆرتریش بەدوایدا دەگڕێن، بۆیە تا ساڵی 2015 حەوت جار چاپكراوەتەوە و لە ئێستاشدا خوێنەری بەردەوامی خۆی هەیە.

لە شاریش و دوای راپەڕین جارێكی دیكە ئەو دەنگە ناشازە دروست دەبێتەوە كاتێك د. فەرهاد پیرباڵ رۆمانی (ملازم تەحسین و شتی تریش) دەنوسێت، بەڵام مام ئەمجارەش یەكلایی دەكاتەوە و د. فەرهاد پیرباڵ دەپارێزێت و ئازادی بۆرۆمانەكەشی فەراهەم دەكات، ئەم رۆمانەش لەم كاتەوە تاكو ئێستاكە چەندین جار چاكراوەتەوە.

لە ئێستاشدا كە مام كۆچی دوایی كردووە، مەلا بەختیار كتێبێك دەنوسێت بەناونیشانی (لەبری بیرەوەری)، ئەم كتێبە ئەوەندەی من ئاگاداربم لەم ماوە كورتەی خۆیدا چاپی دووەمی دەكرێتەوە، ئەوە جگە لەوەی چاپی یەكەمی بەتیراژێكی زۆر چاپكرا، بەڵام بەداخەوە لە رۆژێكی پیرۆزی ئەم حزبەدا كە رۆژی شەهیدانی یەكێتیە وەسێتەكەی مام جەلال وەلا دەنرێت و سزا بۆ خاوەنی كتێبەكە دەردەكەن، من لەوە دڵنیام مام جەلال چ لە شاخ و چ لە شاریش پشتگیری ئازادی رادەربڕینی كردوە، كە نمونەی ئەم دوو بەرهەمەمان بەنمونە هێنایەوە، دڵنیام لە ئێستاشدا لەناو گۆڕدا پشتگیریی ئەم بەرهەمەی مەلا بەختیارە و ئەگەر لە ژیاندا بمایە، دڵنیام نەك هەروەكو موكری و پیرباڵ پشتگیری لە كتێبەكەی مەلا بەختیار دەكرد، بەڵكو پێشەكیشی بۆ دەنوسی و دەیوت: "وەڵامی من و مەلا بەختیار بدەنەوە بەنووسین، نەك دەركردنی بڕیار"..

من سەیرم لەوە دێت لە كۆی ئەو ژمارە زۆرە كەسێك نەبوو دەست هەڵبڕێت و بڵێت: هەڤاڵان ئەوەی ئێمە بڕیاری لێوە دەدەین هەڵەیە، چونكە مام لە شاخ و لە شاریش دژی بڕیارێكی لەم جۆرە بووە، دڵنیام ئێستا لە گۆریشدا لەگەڵ بڕیارێكی لەم جۆرە نییە.

لە كۆتایدا دەڵێم: "هەقە مەلا بەختیار بە بڕیارێكی لەم شێوەیە نیگەران نەبێت، چونكە دڵنیام بەشێكی زۆری ئەوانەی دەستیان هەڵبڕیوە كتێبەكەیان نەخوێندۆتەوە، بەڵكو نیگەرانی مەلا بەختیار لەوەوە بێت كە وەسێتەكەی (مام جەلال)یان شكاندووە و جێبەجێیان نەكردووە".